شاہ سلمان کا سعودی عرب کو مصر کے ساتھ زمینی راستے کے ذریعے ملانے کیلئے سمندر پر پل بنانے کا اعلان
سعودی فرمانروا شاہ سلمان نے سعودی عرب کو مصر کے ساتھ زمینی راستے کے ذریعے ملانے کے لئے بحیرہ احمر پر پل بنانے کا اعلان کیا ہے۔بی بی سی کے مطابق شاہ سلمان اس وقت مصر کے پانچ روزہ دورے پر ہیں جہاں انہوں نے اپنے ایک بیان میں کہا کہ اس پل کی تعمیر سے دو اتحادی ممالک کے مابین تجارت کو فروغ ملے گا جبکہ مصر کے صدر عبدالفتح السیسی نے کہا کہ اس پل کو سعودی بادشاہ کے نام پر رکھا جائے گا۔ شاہ سلمان کا کہنا تھا کہ میں اپنے بھای صدر عبدالفتح السیسی کی دونوں ملکوں کو ملانے کے لئے پل بنانے کی تجویز سے متفق ہوں' بحیرہ احمر پر پل بنانے سے دو براعظموں' ایشیاء اور افریقہ کے مابین تجارت میں غیر معمولی اضافہ ہوگا۔ سعودی بادشاہ کو قاہرہ کی یونیورسٹی سے ڈاکٹریٹ کی اعزازی ڈگری سے نوازا گیا ہے۔ صدر الفتح السیسی نے بحیرہ احمر پرپل کے منصوبے کے بارے میں کہا کہ اس منصوبے سے عربوں کے مشترکہ لائحہ عمل کا نیاباب کھل چکا ہے۔